ກມທ ສະຫຼຸບຖອດຖອນບົດຮຽນ ວຽກງານຮອບດ້ານ ປະຈຳປີ 2024

ກອງປະຊຸມສະຫຼຸບຖອດຖອນບົດຮຽນ ວຽກງານຮອບດ້ານ ປະຈຳປີ 2024 ແລະ ວາງທິດທາງແຜນການ ປະຈຳປີ 2025, ຂອງກົມໃຫ່ຍການເມືອງກອງທັບ (ກມທ) ໄດ້ຈັດຂຶ້ນໃນວັນທີ 16 ມັງກອນ 2025 ນີ້, ໂດຍການເປັນປະທານຂອງ ສະຫາຍ ພົນຕີ ວົງສອນ ອິນປານພິມ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການເມືອງກອງທັບ, ມີຄະນະນໍາກົມໃຫຍ່, ຄະນະພັກ-ຄະນະບັນຊາກົມ, ຫ້ອງການ ແລະ ກອງ ທີ່ຂຶ້ນກັບກົມໃຫຍ່ການເມືອງກອງທັບ ເຂົ້າຮ່ວມ.
ສະຫາຍ ພັນເອກ ວັນໄຊ ຄຳພາວົງ ຫົວໜ້າຫ້ອງການ ກົມໃຫຍ່ການເມືອງກອງທັບ ໄດ້ຜ່ານບົດສະຫຼຸບ ການເຄື່ອນໄຫວ ວຽກງານຮອບດ້ານ ປະຈຳປີ 2024 ແລະ ຜ່ານທິດທາງແຜນການ ປະຈຳປີ 2025 ໃນໄລຍະຜ່ານມາ, ເຊິ່ງຍາມໃດ ຄະນະພັກກົມໃຫຍ່ ໄດ້ເອົາໃນໃສ່ ນຳພາ-ຊີ້ນຳ ໃນການສຶກສາອົບຮົມການເມືອງ-ແນວຄິດ ໃຫ້ພະນັກງານ-ນັກຮົບ ດ້ວຍຫຼາຍຮູບ ແລະ ຫຼາຍວິທີແທດເໝາະ ໂດຍໄດ້ນໍາເອົາບັນດາເອກະສານຕ່າງໆ ມາເຜີຍແຜ່, ເຊື່ອມຊຶມ ໃຫ້ພະນັກງານ-ນັກຮົບ ເປັນປົກກະຕິ, ເປັນຕົ້ນ ການຈັດຕັ້ງຜັນຂະຫຍາຍວາລະແຫ່ງຊາດ, ເອກະສານ 4 ບົດ, ການສ້າງເສດຖະກິດ ເອກະລາດເປັນເຈົ້າຂອງຕົນເອງ ໃນໄລຍະໃໝ່ ໃຫ້ບັນດາກົມກອງທົ່ວກອງທັບ, ຊີ້ນຳຈັດຕັ້ງໂຄສະນາ-ປາຖະກະຖາວັນປະຫວັດສາດສຳຄັນຕ່າງໆ, ຊຸກຍູ້ສ້າງກົມກອງ-ນັກຮົບວັດທະນະທຳ ໃນທົ່ວກອງທັບ ໄດ້ຮັບຮອງຢັ້ງຢືນ ຈຳນວນ 138 ກົມກອງ, ຊີ້ນຳວຽກງານຖະແຫຼງຂ່າວ-ວັດທະນະທຳ ແລະ ສື່ມວນຊົນໃນກອງທັບ ເຄື່ອນໄຫວຕາມພາລະບົດບາດຂອງຕົນ, ທັງໄດ້ຊີ້ນຳກຳແໜ້ນຮາກຖານການເມືອງໂດຍຫັນກຳລັງ ລົງກໍ່ສ້າງຮາກຖານການເມືອງ ຕາມແບບມູນເຊື້ອ ກວມເອົາ 8.507 ບ້ານ, ສ້າງຄອບຄົວ ແລະ ບ້ານປ້ອງກັນຊາດເຂັ້ມແຂງ ໄດ້ 262.218 ຄອບຄົວ, ມີ 2.900 ບ້ານ, ສ້າງບ້ານແຮກສ່ຽວກັບກົມກອງ ໄດ້ 1.071 ບ້ານ, ຮັບປະກັນໃຫ້ແກ່ກອງປະຊຸມອາຊຽນ 2024 ທີ່ລາວເຮົາເປັນເຈົ້າພາບມີຄວາມສະຫງົບປອດໄພດີ, ໄດ້ຈັດຕັ້ງເຝິກອົບຮົມ ວຽກງານກວດສອບເລຂາ-ຮອງເລຂາຮາກຖານພັກ ໄດ້ 2 ຄະນະພັກ, ປະກາດການແຕ່ງຕັ້ງຄະນະຊີ້ນຳ, ອະນຸກຳມະການກະກຽມດຳເນີນກອງປະຊຸມໃຫຍ່ຜູ້ແທນ ຄັ້ງທີ VI ຂອງອົງຄະນະພັກກະຊວງປ້ອງກັນປະເທດ, ການທາບທາມບຸກຄະລາກອນ (ຮອບທີ 1, 2, 3), ດຳເນີນກອງປະຊຸມໃຫຍ່ສະມາຊິກພັກຂັ້ນຂອງຕົນ ໄດ້ 21 ຄະນະພັກ, ປະກາດຮັບຮອງເອົາຄະນະບໍລິຫານງານພັກຊຸດໃໝ່ ຈຳນວນ 16 ຄະນະພັກ, ອະນຸມັດສ້າງຕັ້ງຄະນະພັກ ແລະ ບົ່ງຕົວແຕ່ງຕັ້ງປ່ຽນແທນ 13 ກົມກອງ, ມອບໃບຢັ້ງຢືນໜ່ວຍພັກປອດໃສ ເຂັ້ມແຂງ ໜັກແໜ້ນ ທົ່ວກຳລັງຫຼວງ ປະຈຳປີ 2023 ແລະ ຄົ້ນຄວ້າຢັ້ງຢືນຮັບຮອງເປັນໜ່ວຍພັກປອດໃສ ເຂັ້ມແຂງ ໜັກແໜ້ນ ທົ່ວກຳລັງຫຼວງ ປະຈຳປີ 2024 ຈຳນວນ 1.397 ໜ່ວຍພັກ, ປະກາດເລື່ອນຊັ້ນນາຍທະຫານຂັ້ນສູງແຕ່ຊັ້ນ ພັນເອກ ຫາ ພົນໂທ ໄດ້ 57 ສະຫາຍ, ພັນໂທ ຂຶ້ນ ພັນເອກ 89 ສະຫາຍ, ພັນຕີ ຂຶ້ນ ພັນໂທ 1.254 ສະຫາຍ, ເລື່ອນຊັ້ນ-ປະດັບທຽບຊັ້ນນັກຮຽນ ທັງພາຍໃນ ແລະ ຕ່າງປະເທດ ໄດ້ 19.931 ສະຫາຍ, ໄປຮຽນກໍ່ສ້າງ-ບຳລຸງ ຢູ່ພາຍໃນ ແລະ ຕ່າງປະເທດ 5.087 ສະຫາຍ, ໄດ້ຈັດຕັ້ງປະຕິບັດນະໂຍບາຍໃຫ້ກົມກອງລວມໝູ່-ບຸກຄົນດີເດັ່ນທົ່ວກອງທັບ, ມອບຍ້ອງຍໍປະເພດຫຼຽນໄຊແຮງງານ ລວມ 12.415 ໜ່ວຍ, ຫຼຽນໄຊພິລະອາດຫານ ລວມ 17.506 ໜ່ວຍ, ຫຼຽນກາແຮງງານ 16.197 ໜ່ວຍ, ຫຼຽນກຽດຕິຄຸນ ແລະ ຫຼຽນກາລະນຶກ 70 ປີກອງທັບ ລວມ 161 ໜ່ວຍ, ໃບຍ້ອງຍໍຂັ້ນຕ່າງໆ 34.654 ໃບ ແລະ ວຽກງານດ້ານອື່ນໆກໍມີຜົນສໍາເລັດເປັນຢ່າງດີ. ໃນພິທີ ຍັງໄດ້ຜ່ານຂໍ້ຕົກລົງ ວ່າດ້ວຍການມອບຫຼຽນໄຊພິລະອາດຫານ ແລະ ໃບຍ້ອງຍໍຜົນງານ 5 ປີ, ໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີຜ່ານມາ, ໃນນີ້, ກະຊວງປ້ອງກັນປະເທດຕົກລົງ ມອບຫຼຽນໄຊພິລະອາດຫານຊັ້ນ I ໃຫ້ບຸກຄົນ ຈຳນວນ 10 ສະຫາຍ, ຫຼຽນໄຊພິລະອາດຫານ ຊັ້ນ II ຈຳນວນ 196 ສະຫາຍ, ຫຼຽນໄຊພິລະອາດຫານ ຊັ້ນ III ຈຳນວນ 328 ສະຫາຍ, ໃບຍ້ອງຍໍກະຊວງປ້ອງກັນປະເທດ ຈຳນວນ 120 ສະຫາຍ ແລະ ຜ່ານຂໍ້ຕົກລົງ ວ່າດ້ວຍການມອບໃບຍ້ອງຍໍ ຂອງກົມໃຫຍ່ການເມືອງກອງທັບ ໃຫ້ບຸກຄົນ ຈຳນວນ 82 ສະຫາຍ. ໂດຍການຂຶ້ນມອບຂອງ ຄະນະນຳກົມໃຫຍ່ການເມືອງກອງທັບ ຕາມລຳດັບ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ