ສະຫະພັນແມ່ຍິງ ກົມໃຫຍ່ການເມືອງ ກອງທັບ ຢ້ຽມຊົມຫໍພິພິທະພັນປະຫວັດສາດກອງທັບ

ວັນທີ 17 ມັງກອນ 2025 ນີ້, ສະຫາຍ ພັນຕີ ນາງ ມະໂນລັກ ປັນຍາທອງ ຫົວໜ້າພະແນກສະຫະພັນແມ່ຍິງ ກົມໃຫຍ່ການເມືອງກອງທັບ ໄດ້ນຳພາສະມາຊິກແມ່ຍິງທົ່ວກົມໃຫຍ່ການເມືອງກອງທັບ ເຂົ້າຢ້ຽມຊົມຫໍພິພິທະພັນ ປະຫວັດສາດກອງທັບ.
ສະຫາຍ ພັນຕີ ນາງ ມະໂນລັກ ປັນຍາທອງ ໃຫ້ຮູ້ວ່າ: ການນໍາພາສະມາຊິກສະຫະພັນແມ່ຍິງເຂົ້າຢ້ຽມຊົມຫໍພິພິທະພັນປະຫວັດສາດກອງທັບ ໃນຄັ້ງນີ້ ແມ່ນເພື່ອສ້າງຂະບວນການຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວ ຄົບຮອບ 76 ປີ, ກອງປະຊຸມຜູ້ແທນ ສະຫະພັນແມ່ຍິງທົ່ວກອງທັບ ຄັ້ງທີ IX ແລະ ກອງປະຊຸມໃຫຍ່ ຄັ້ງທີ VI ຂອງອົງຄະນະພັກ ກົມໃຫຍ່ການເມືອງກອງທັບ ທີ່ຈະໄຂຂຶ້ນໃນມໍ່ໆນີ້ ໃຫ້ມີບັນຍາກາດຟົດຟື້ນ ແລະ ກວ້າງຂວາງ. ພ້ອມກັນນັ້ນ, ກໍເພື່ອເປັນການສຶກສາອົບຮົມ ໃຫ້ສະມາຊິກແມ່ຍິງ ເຊື່ອມຊຶມກຳແໜ້ນຕື່ມ ເຖິງມູນເຊື້ອອັນດີງາມ ຂອງບັນພະບຸລຸດ ກໍຄື ນັກຮົບປະຕິວັດ ທີ່ໄດ້ເສຍສະຫຼະເລືອດເນື້ອ, ອຸທິດຕົນ ເຂົ້າໃນພາລະກິດຕໍ່ສູ້ກູ້ຊາດ ຍາດເອົາເອກະລາດ ມາສູ່ປະເທດຊາດເຮົາ, ທັງເຫັນໄດ້ພາລະກິດປະຕິວັດ ແລະ ເສັ້ນທາງແຫ່ງການຕໍ່ສູ້ປົດປ່ອຍຊາດ, ການເສຍສະຫຼະຢ່າງສູງສົ່ງ, ຄວາມອົງອາດກ້າຫານ ແລະ ບໍ່ຍອມຈຳນົນຕໍ່ສັດຕູ ຂອງບັນດານັກຮົບປະຕິວັດລາວ, ເຊິ່ງໄດ້ກາຍເປັນມູນເຊື້ອອັນດີງາມ, ເປັນບົດຮຽນອັນລໍ້າຄ່າ ແລະ ກາຍເປັນແວ່ນແຍງອັນໃສແຈ້ງ ໃນການສຶກສາຄົ້ນຄວ້າຮໍ່າຮຽນເຝິກຝົນຫຼໍ່ຫຼອມຕົນເອງ ຂອງພະນັກງານ-ນັກຮົບ ກໍຄືສະມາຊິກສະຫະພັນແມ່ຍິງກົມໃຫຍ່ການເມືອງກອງທັບ ໃຫ້ມີຄຸນສົມບັດສິນທຳປະຕິວັດ ແລະ ກາຍເປັນຜູ້ສືບທອດທີ່ດີຂອງກອງທັບ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ