ຫຼາຍພາກສ່ວນເຂົ້າອວຍພອນ ຫ້ອງການສະຫະພັນແມ່ຍິງກອງທັບ

ວັນທີ 21 ມັງກອນ 2025 ນີ້, ມີຫຼາຍພາກສ່ວນໄດ້ນໍາເອົາກະຕ່າຂອງຂວັນເຂົ້າອວຍພອນຫ້ອງການສະຫະພັນແມ່ຍິງກອງທັບ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 76 ປີ, ໃນນີ້ມີ ຄະນະແມ່ຍິງກະຊວງພະລັງງານ ແລະ ບໍ່ແຮ່ ນໍາໂດຍທ່ານ ນາງ ໂຄຕະມີ ຈັນທະມາລິນ ປະທານສະຫະພັນແມ່ຍິງ ກະຊວງພະລັງງານ ແລະ ບໍ່ແຮ່, ຄະນະແມ່ຍິງ ສະຖາບັນການເມືອງ ແລະ ການປົກຄອງແຫ່ງຊາດ ນຳພາໂດຍທ່ານ ປອ ນາງ ຄຳແພ່ນ ເພັງພັກດີ ຮອງປະທານສະຫະພັນແມ່ຍິງ ສະຖາບັນການເມືອງ ແລະ ການປົກຄອງ, ຄະນະແມ່ຍິງກະຊວງການເງິນ ນຳໂດຍທ່ານ ນາງ ດາວອນ ທອງຈັນ ປະທານຄະນະບໍລິຫານງານສະຫະພັນແມ່ຍິງ ກະຊວງການເງິນ, ເຊິ່ງໃຫ້ການຕ້ອນຮັບໂດຍ ສະຫາຍ ພົນຈັດຕະວາ ນາງ ໄພວອນ ອິນທະບຸດ ຄະນະບໍລິຫານງານສູນກາງສະຫະພັນແມ່ຍິງລາວ, ຫົວໜ້າຫ້ອງການສະຫະພັນແມ່ຍິງກອງທັບ ພ້ອມຄະນະ, ນອກນີ້ ສະຫະພັນແມ່ຍິງ ກະຊວງພະລັງງານ ແລະ ບໍ່ແຮ່, ສະຫະພັນແມ່ຍິງກະຊວງການເງິນ ໄດ້ມອບວັດຖຸປັດ ໃຫ້ຫ້ອງການສະຫະພັນແມ່ຍິງກອງທັບ ພາກສ່ວນລະ 5.000.000 ກີບ ລວມເປັນເງິນ ຈຳນວນ 10.000.000 ກີບ ຕື່ມອີກ.
ໂອກາດນີ້, ສະຫາຍ ພົນຈັດຕະວາ ນາງ ໄພວອນ ອິນທະບຸດ ໄດ້ຕາງໜ້າໃຫ້ຄະນະສະຫະພັນແມ່ຍິງກອງທັບ ກ່າວສະແດງຄວາມຂອບໃຈຕໍ່ ພາກສ່ວນຕ່າງໆ ທີ່ເຂົ້າມາອວຍພອນ ແລະ ເຫັນໄດ້ຄວາມໝາຍຄວາມສໍາຄັນ ຂອງວັນສ້າງຕັ້ງກອງທັບປະຊາຊົນລາວ ຄົບຮອບ 76 ປີ, ພ້ອມທັງອວຍພອນໃຫ້ສະຫະພັນແມ່ຍິງທັງສາມຄະນະ ຈົ່ງມີສຸຂະພາບ ເຂັ້ມແຂງ, ເຮັດສຳເລັດໃນໜ້າທີ່ວຽກງານອັນມີກຽດ, ສືບຕໍ່ຊີ້ນໍາ-ນໍາພາ ແລະ ເສີມຂະຫຍາຍມູນເຊື້ອອັນດີງາມຂອງສະຫະພັນແມ່ຍິງໃຫ້ ເຕີບໃຫຍ່ຂະຫຍາຍຕົວກ້າວຂຶ້ນເລື້ອຍໆ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ