ເປີດງານຕະຫຼາດນັດ ສະຫະພັນແມ່ຍິງກອງທັບ

ພິທີເປີດງານຕະຫຼາດນັດ ສະຫະພັນແມ່ຍິງກອງທັບ ໄດ້ຈັດຂຶ້ນໃນວັນທີ 28 ມັງກອນ 2025 ນີ້, ໂດຍການມີສະຫາຍ ພົນຕີ ໄພວັນ ຈັນທະພົມມາ ຮອງຫົວໜ້າກົມໃຫຍ່ການເມືອງກອງທັບ, ຜູ້ຊີ້ນໍາອົງການຈັດຕັ້ງມະຫາຊົນ, ມີທ່ານ ນາງ ລາວັນ ສຸດທິສານ ຮອງປະທານສູນກາງສະຫະພັນແມ່ຍິງລາວ, ມີສະຫາຍ ພົນຈັດຕະວາ ນາງ ໄພວອນ ອິນທະບຸດ ຫົວໜ້າຫ້ອງການສະຫະພັນແມ່ຍິງກອງທັບ, ມີຄະນະພັກ-ຄະນະບັນຊາກົມ, ກອງ, ຫ້ອງການ, ແຂກຖືກເຊີນ ພ້ອມດ້ວຍສະມາຊິກສະຫະພັນແມ່ຍິງກອງທັບເຂົ້າຮ່ວມ.
ສະຫາຍ ພົນຈັດຕະວາ ນາງ ໄພວອນ ອິນທະບຸດ ໄດ້ກ່າວເປີດງານວ່າ: ຕະຫຼາດນັດວາງສະແດງຜະລິດຕະພັນກະສິກຳ, ຫັດຖະກຳຂອງສະຫະພັນແມ່ຍິງກອງທັບ ຮ່ວມກັບສະມາຄົມຄຸນຄ່າລາວໃນການຈັດງານຕະຫຼາດນັດຄັ້ງນີ້ ແມ່ນກິດຈະກຳໜຶ່ງທີ່ສ້າງເງື່ອນໄຂທີ່ອໍານວຍຄວາມສະດວກ ແລະ ສ້າງໂອກາດໃຫ້ສະມາຊິກສະຫະພັນແມ່ຍິງກອງທັບ ໄດ້ນໍາເອົາຜະລິດຕະພັນຕ່າງໆ ທີ່ບຸກຄົນ ແລະ ຄອບຄົວຜະລິດໄດ້ມາວາງສະແດງ ເພື່ອຈຳໜ່າຍ, ໂຄສະນາໃຫ້ເຂົ້າເຖິງບຸກຄົນ ແລະ ການຕະຫຼາດ ເພື່ອໃຫ້ແນວຄິດ ແລະ ວິທີການໃໝ່ໆ, ດ້ວຍຈິດໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ທັງເປັນການແລກປ່ຽນບົດຮຽນເຊິ່ງກັນ ແລະ ກັນ ເພື່ອແນໃສ່ສົ່ງເສີມໃຫ້ສະຫະພັນແມ່ຍິງກອງທັບ ໄດ້ປະກອບສ່ວນເຂົ້າໃນການຜະລິດເປັນສິນຄ້າ, ສ້າງລາຍຮັບໃຫ້ແກ່ຄອບຄົວ ແລະ ກົມກອງນັບມື້ເພີ່ມຂຶ້ນ ພ້ອມນັ້ນ ຂໍສະແດງຄວາມຊົມເຊີຍມາຍັງຄະນະຮັບຜິດຊອບທຸກພາກສ່ວນທີ່ໄດ້ເອົາໃຈໃສ່ຫ້າງຫາກະກຽມວຽກງານດ້ານຕ່າງໆ ໃຫ້ແກ່ງານຕະຫຼາດນັດ, ບັນດາພະແນກ, ຂະແໜງສະຫະພັນແມ່ຍິງໃນກຳລັງຫຼວງ ແລະ ກໍາລັງທ້ອງຖິ່ນ ທີ່ມີຄວາມຮັບຜິດຊອບສູງໃນການປຸກລະດົມຊຸກຍູ້ ແລະ ກະກຽມນໍາ ເອົາຜະລິດຕະພັນກະສິກຳ, ຫັດຖະກຳ, ສີໄມ້ລາຍມືອັນປານີດ, ເຄື່ອງອຸປະໂພກ-ບໍລິໂພກຂອງຄອບຄົວຕົວແບບ ແລະ ຜົນຜະລິດຂອງຄອບຄົວນາຍ ແລະ ພົນທະຫານ ເພື່ອມາວາງສະແດງໃນຄັ້ງນີ້ ທັງເປັນການປະກອບສ່ວນໃນການສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ຜູ້ແທນ ຄັ້ງທີ VI ຂອງອົງຄະນະພັກ ກົມໃຫຍ່ການເມືອງກອງທັບ, ກອງປະຊຸມຜູ້ແທນແມ່ຍິງທົ່ວກອງທັບ ຄັ້ງທີ IX ທີ່ຈະຈັດຂຶ້ນໃນມໍ່ໆ ນີ້, ພ້ອມທັງ ຮຽກຮ້ອງມາຍັງບັນດາຄະນະນໍາສະຫະພັນແມ່ຍິງທຸກຂັ້ນ, ສະມາຊິກສະຫະພັນແມ່ຍິງ ແລະ ຫົວໜ່ວຍທຸລະກິດທຸກພາກສ່ວນທີ່ນໍາເອົາຜະລິດຕະພັນຕ່າງໆ ມາວາງຈຳໜ່າຍໃນງານຕະຫຼາດນັດ ຈົ່ງພ້ອມກັນເອົາໃຈໃສ່ຮັກສາຄວາມສະຫງົບປອດໄພ, ມີຄວາມສາມັກຄີແໜ້ນແຟ້ນ ແລະ ມີຄວາມເປັນລະບຽບຮຽບຮ້ອຍດີ.
ງານຕະຫຼາດນັດຄັ້ງນີ້ ມີຈໍານວນ 31 ຫົວໜ່ວຍກົມກອງເຂົ້າຮ່ວມວາງສະແດງສິນຄ້າ, ມີ 226 ຮ້ານ ທີ່ມາຈາກສະຫະພັນແມ່ຍິງກອງທັບ, ຄອບຄົວຕົວແບບ, ສະມາຄົມຄຸນຄ່າລາວ, ຄອບຄົວທະຫານ-ພະນັກງານ ເຊິ່ງຈະໄດ້ດໍາເນີນໄປເປັນເວລາ 3 ວັນ ນັບແຕ່ວັນທີ 28-30 ມັງກອນ 2025 ເລີ່ມເວລາ 8:30-18:00 ໂມງ. ຫຼັງຈາກນັ້ນ, ບັນດາຄະນະນໍາ ແລະ ແຂກຖືກເຊີນ ໄດ້ເຂົ້າຢ້ຽມຊົມແຕ່ລະຫ້າງຮ້ານ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ