ປະກາດການເລື່ອນຊັ້ນ, ເລື່ອນທຽບຊັ້ນ ພັນຕີ ຂຶ້ນຊັ້ນ ພັນໂທ ຢູ່ບັນດາກົມກອງເຂດໃຈກາງ

ວັນທີ 29 ມັງກອນ 2025 ນີ້, ຢູ່ທີ່ສະໂມສອນກົມໃຫຍ່ເສນາທິການກອງທັບ ໄດ້ຈັດພິທີປະກາດການເລື່ອນຊັ້ນ, ເລື່ອນທຽບຊັ້ນ ພັນຕີ ຂຶ້ນຊັ້ນ ພັນໂທ ໃຫ້ນາຍທະຫານ ຢູ່ບັນດາກົມກອງເຂດໃຈກາງ ຈໍານວນ 171 ສະຫາຍ, ໂດຍການເປັນປະທານ ຂອງສະຫາຍ ພົນຕີ ສອນທອງ ພົມລາວົງ ກໍາມະການຄະນະພັກກະຊວງປ້ອງກັນປະເທດ, ຮອງຫົວໜ້າກົມໃຫຍ່ການເມືອງກອງທັບ, ມີຄະນະພັກ-ຄະນະບັນຊາ ຕາງໜ້າກົມກອງເຂດໃຈກາງ ຕະຫຼອດຮອດນາຍທະຫານຈາກກົມກອງຕ່າງໆ ທັງກໍາລັງຫຼວງ ແລະ ກໍາລັງທ້ອງຖິ່ນ 3 ແຂວງ ເຂດພາກກາງເຂົ້າຮ່ວມ.
ສະຫາຍ ພັນເອກ ຄໍາເອ້ຍ ສຸກແສງເໜືອ ຮອງຫົວໜ້າກົມພະນັກງານ ກົມໃຫຍ່ການເມືອງກອງທັບ ໄດ້ຜ່ານຂໍ້ຕົກລົງ ຂອງກະຊວງປ້ອງກັນປະເທດ ວ່າດ້ວຍການເລື່ອນຊັ້ນນາຍທະຫານ ຈາກຊັ້ນ ພັນຕີ ຂຶ້ນຊັ້ນ ພັນໂທ ບັນດາກົມກອງເຂດໃຈກາງ ໃນນັ້ນ, ກະຊວງປ້ອງກັນປະເທດ ຕົກລົງປະກາດເລື່ອນຊັ້ນ, ເລື່ອນທຽບຊັ້ນ ພັນຕີ ຂຶ້ນຊັ້ນ ພັນໂທ ທັງໝົດ 171 ສະຫາຍ ໃນນີ້, ຢູ່ກົມໃຫຍ່ການເມືອງກອງທັບມີ 32 ສະຫາຍ, ຫ້ອງການ ປກຊ-ປກສ 1 ສະຫາຍ, ກອງພົນທີ 1 ມີ 10 ສະຫາຍ, ກອງບັນຊາການທະຫານແຂວງວຽງຈັນ 10 ສະຫາຍ, ກອງບັນຊາການທະຫານນະຄອນຫຼວງວຽງຈັນ 10 ສະຫາຍ, ກອງບັນຊາການທະຫານແຂວງບໍລິຄໍາໄຊ 13 ສະຫາຍ, ກອງພັນໃຫຍ່ 11 ມີ 5 ສະຫາຍ, ກອງພັນໃຫຍ່ 279 ມີ 6 ສະຫາຍ, ກອງພັນໃຫຍ່497 ມີ 7 ສະຫາຍ, ກອງພັນໃຫຍ່ 605 ມີ 6 ສະຫາຍ, ກອງພັນໃຫຍ່ 641 ມີ 8 ສະຫາຍ, ກອງພັນໃຫຍ່ 661 ມີ 10 ສະຫາຍ, ກອງພັນໃຫຍ່ 941 ມີ 6 ສະຫາຍ, ວິທະຍາຄານນາຍທະຫານບົກກົມມະດໍາ 8 ສະຫາຍ, ວິທະຍາຄານພະລາທິການກອງທັບ 9 ສະຫາຍ, ວິທະຍາຄານເຕັກນິກການທະຫານ 11 ສະຫາຍ, ໂຮງຮຽນທິດສະດີການເມືອງກອງທັບ 13 ສະຫາຍ, ໂຮງຮຽນວັດທະນະທໍາຊົນເຜົ່າກອງທັບ 4 ສະຫາຍ ແລະ ນັກຮຽນຕ່າງປະເທດ 2 ສະຫາຍ.
ໂອກາດນີ້, ສະຫາຍ ພົນຕີ ສອນທອງ ພົມລາວົງ ໄດ້ສະແດງຄວາມຍ້ອງຍໍຊົມເຊີຍ ພ້ອມທັງ ເນັ້ນໜັກໃຫ້ນາຍທະຫານທຸກສະຫາຍທີ່ໄດ້ຮັບການເລື່ອນຊັ້ນ, ເລື່ອນທຽບຊັ້ນໃໝ່ ຈົ່ງພ້ອມກັນເພີ່ມຄວາມຮັບຜິດຊອບຕໍ່ໜ້າທີ່ວຽກງານຂອງຕົນໃຫ້ມີຄວາມໜັກແໜ້ນ, ເຂັ້ມແຂງ, ສືບຕໍ່ເພີ່ມທະວີຄວາມສາມັກຄີພາຍໃນໃຫ້ເປັນປຶກແຜ່ນແໜ້ນໜາ ບົນພື້ນຖານຄວາມເປັນເອກະພາບພາຍໃນໝູ່ຄະນະ, ແບ່ງວຽກງານໃຫ້ບຸກຄົນຮັບຜິດຊອບຢ່າງມີແບບແຜນ ແລະ ຊຸກຍູ້ຕິດຕາມ ເພື່ອຮັບປະກັນໃຫ້ມີຜົນສໍາເລັດຕາມຈຸດປະສົງຄາດໝາຍ, ເປັນແບບຢ່າງໃນການເຝິກຝົນຫຼໍ່ຫຼອມຕົນເອງຮອບດ້ານ, ເອົາໃຈໃສ່ສຶກສາອົບຮົມການເມືອງ-ນໍາພາແນວຄິດໃຫ້ພະນັກງານສະມາຊິກພັກ-ນັກຮົບພາຍໃນກົມກອງໃຫ້ໜັກແໜ້ນ ແລະ ຖືເອົາຄວາມເປັນແບບຢ່າງທີ່ດີໃນການນໍາພາ-ບັນຊາ ເພື່ອສ້າງໃຫ້ກາຍເປັນນາຍທະຫານຜູ້ສືບທອດປ່ຽນແທນທີ່ດີຂອງກອງທັບ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ