ພິທີສະເຫຼີມສະຫຼອງວັນສ້າງຕັ້ງໜັງສືພິມກອງທັບປະຊາຊົນລາວ ຄົບຮອບ 60 ປີ

ອີງຕາມທິດຊີ້ນໍາ ຂອງຄະນະພັກກະຊວງປ້ອງກັນປະເທດ ແລະ ກົມໃຫຍ່ການເມືອງກອງທັບ ກ່ຽວກັບການຈັດຕັ້ງລະນຶກວັນສ້າງຕັ້ງກົມກອງ, ເຫຼົ່າຮົບ ໃນກອງທັບປະຊາຊົນລາວ ໃຫ້ມີເນື້ອໃນຄົບຖ້ວນ ແລະ ເຕັມໄປດ້ວຍຄວາມໝາຍສໍາຄັນເລິກເຊິ່ງ, ອີງຕາມ ແຜນການຈັດຕັ້ງສະເຫຼີມສະຫຼອງວັນສ້າງຕັ້ງ ໜັງສືພິມກອງທັບປະຊາຊົນລາວ ຄົບຮອບ 60 ປີ ເພື່ອເຮັດໃຫ້ການຈັດຕັ້ງສະເຫຼີມສະຫຼອງ ວັນສ້າງຕັ້ງໜັງສືພິມກອງທັບປະຊາຊົນລາວ ຄົບຮອບ 60 ປີ (20 ມັງກອນ 1965-20 ມັງກອນ 2025) ເປັນຂະບວນການຟົດຟື້ນ, ແຂງແຮງ ແລະ ປະສົບຜົນສໍາເລັດຢ່າງຈົບງາມ. ໃນວັນທີ 31 ມັງກອນ 2025 ນີ້, ຢູ່ທີສະໂມສອນກົມໃຫຍ່ການເມືອງກອງທັບ, ກອງບັນນາທິການໜັງສືພິມກອງທັບປະຊາຊົນລາວ ໄດ້ຈັດຕັ້ງພິທີສະເຫຼີມສະຫຼອງວັນສ້າງຕັ້ງໜັງສືພິມກອງທັບປະຊາຊົນລາວ ຄົບຮອບ 60 ປີ ໂດຍການເປັນປະທານ ຂອງສະຫາຍ ພົນໂທ ຄໍາລຽງ ອຸທະໄກສອນ ກຳມະການສູນກາງພັກ, ລັດຖະມົນຕີກະຊວງປ້ອງກັນປະເທດ, ມີຄະນະນໍາບັນດາກົມໃຫຍ່, ຫ້ອງວ່າການກະຊວງປ້ອງກັນປະເທດ, ຜູ້ຕາງໜ້າກົມ, ຫ້ອງການ, ກອງອ້ອມຂ້າງກະຊວງປ້ອງກັນປະເທດ, ແຂກຖືກເຊີນຈາກພາກສ່ວນຕ່າງໆ, ພະນັກງານອາວຸໂສບຳນານ ຕະຫຼອດຮອດຄະນະພັກ-ຄະນະບັນນາທິການ, ພະນັກງານ-ນັກຮົບ ທົ່ວກອງບັນນາທິການໜັງສືພິມກອງທັບປະຊາຊົນລາວ ເຂົ້າຮ່ວມ.
ສະຫາຍ ພັນໂທ ວັນເຮືອງ ສີວິໄລ ຫົວໜ້າບັນນາທິການໜັງສືພິມກອງທັບປະຊາຊົນລາວ ໄດ້ຫວນຄືນມູນເຊື້ອປະຫວັດແຫ່ງການກຳເນີດ, ເຕີບໃຫຍ່ຂະຫຍາຍຕົວ ແລະ ຜົນງານການເຄື່ອນໄຫວ ຂອງໜັງສືພິມກອງທັບປະຊາຊົນລາວ ສ້າງໄດ້ຕະຫຼອດ 60 ປີ ຜ່ານມາ, ນັບແຕ່ຊຸມປີ 1960 ສະພາບສົງຄາມຮຸກຮານ ຂອງຈັກກະພັດອາເມຣິກາ ຢູ່ປະເທດເຮົາໄດ້ກ້າວຂຶ້ນສູ່ລະດັບສູງ ຫຼື ເອີ້ນວ່າ ສົງຄາມພິເສດ. ໄປຄຽງຄູ່ກັບສຽງປືນທີ່ດັງສະນັ່ນ ຢູ່ກາງສະໜາມຮົບທີ່ດຸເດືອດ ແລະ ເອົາເປັນເອົາຕາຍ ລະຫວ່າງກຳລັງປະຕິວັດ ກັບສັດຕູຜູ້ຮຸກຮານ ບົນສະໜາມຮົບການເມືອງ-ແນວຄິດ ກໍມີຄວາມຮຽກຮ້ອງຕ້ອງການອັນຈຳເປັນ ແລະ ຮີບດ່ວນໃຫ້ປະກອບອາວຸດອັນແຫຼມຄົມ ເພື່ອໂຄສະນາປຸກລະດົມຈິດໃຈຄຽດແຄ້ນສັດຕູຜູ້ຮຸກຮານ ພ້ອມທັງປຸກລະດົມນ້ຳໃຈຮັກຊາດ, ນ້ຳໃຈຕໍ່ສູ້ເດັດດ່ຽວບໍ່ຍອມຈຳນົນຂອງນັກຮົບ ແລະ ປະຊາຊົນລາວບັນດາເຜົ່າໃຫ້ສູງຂຶ້ນ. ໂດຍປະຕິບັດຕາມຄຳສັ່ງ ຂອງຄະນະພັກການທະຫານສູນກາງ ແລະ ກອງບັນຊາການສູງສຸດກອງທັບປົດປ່ອຍປະຊາຊົນລາວ ກ່ຽວກັບການສ້າງຕັ້ງ ໜັງສືພິມກອງທັບປົດປ່ອຍປະຊາຊົນລາວຂຶ້ນໃຫ້ທັນກັບຄວາມຮຽກຮ້ອງຕ້ອງການ ຂອງວຽກງານໂຄສະນາປຸກລະດົມນໍ້າໃຈຄຽດແຄ້ນຕໍ່ສັດຕູຜູ້ຮຸກຮານ, ພ້ອມທັງປຸກລະດົມນໍ້າໃຈຮັກຊາດ, ນໍ້າໃຈຕໍ່ສູ້ເດັດດ່ຽວບໍ່ຍອມຈໍານົນ ຂອງປະຊາຊົນລາວບັນດາເຜົ່າໃຫ້ສູງຂຶ້ນ ພ້ອມດຽວກັນນັ້ນ, ກໍເພື່ອປະກອບສ່ວນເຮັດໜ້າທີ່ໂຄສະນາເຜີຍແຜ່ແນວທາງນະໂຍບາຍຂອງພັກ, ໜ້າທີ່ຂອງການປະຕິວັດ ແລະ ຂອງກອງທັບ ໃຫ້ທັນເວລາ, ປຸກລະດົມການຈັດຕັ້ງປະຕິບັດຄໍາຂວັນທີ່ວ່າ: ທຸກສິ່ງທຸກຢ່າງເພື່ອແນວໜ້າ, ທຸກສິ່ງທຸກຢ່າງເພື່ອຕີເອົາຊະນະຈັກກະພັດອາເມຣິກາ ແລະ ລູກມືນັ້ນ, ທ້າຍປີ 1964 ທ່ານ ສະໝານ ວິຍະເກດ ຄະນະພັກການທະຫານສູນກາງ, ຫົວໜ້າຫ້ອງການເມືອງ ກອງບັນຊາການສູງສຸດ ກອງທັບປົດປ່ອຍປະຊາຊົນລາວ ໃນເວລານັ້ນ ໄດ້ແນະນໍາໃຫ້ ທ່ານ ຄູນ ຈັນແດງ ຫົວໜ້າພະແນກໂຄສະນາອົບຮົມ ຄົ້ນຄວ້າເຕົ້າໂຮມເອົາພະນັກງານຈໍານວນໜຶ່ງ ທີ່ມີຄວາມຮູ້, ຄວາມສາມາດ ໃນວຽກງານດັ່ງກ່າວມາຮັບຜິດຊອບຜະລິດໜັງສືພິມກອງທັບ ໂດຍໄດ້ແຕ່ງຕັ້ງ ທ່ານ ວິໄຊ ບໍໃບຄໍາ ເປັນຫົວໜ້າບັນນາທິການ. ພາຍຫຼັງໄດ້ກະກຽມທາງດ້ານບຸກຄະລາກອນ ແລະ ເນື້ອໃນຂອງໜັງສືພິມໄດ້ໄລຍະໜຶ່ງ, ມາຮອດວັນທີ 20 ມັງກອນ 1965 ໜັງສືພິມກອງທັບປົດປ່ອຍປະຊາຊົນລາວ ສະບັບທຳອິດ ກໍໄດ້ຮັບການຜະລິດ ແລະ ພິມຈໍາໜ່າຍອອກສູ່ສາຍຕາ ຂອງມະຫາຊົນ ຢູ່ທີ່ເຂດທີ່ໝັ້ນ ເມືອງວຽງໄຊ ແຂວງຫົວພັນ ດ້ວຍລະບົບການພິມແບບຕີໂປ. ການກໍາເນີດຂຶ້ນຂອງໜັງສືພິມກອງທັບປົດປ່ອຍປະຊາຊົນລາວ ແມ່ນເຫດການປະຫວັດສາດທີ່ມີຄວາມໝາຍອັນເລິກເຊິ່ງ ແລະ ເປັນຂີດໝາຍ ຂອງການເຕີບໃຫຍ່ຂະຫຍາຍຕົວ ຂອງກອງທັບປົດປ່ອຍປະຊາຊົນລາວ ສະທ້ອນໃຫ້ເຫັນຄວາມເອົາໃຈໃສ່ ຂອງຄະນະພັກການທະຫານສູນກາງ ທີ່ມີຕໍ່ວຽກງານການເມືອງແນວຄິດ. ເຊິ່ງຕະຫຼອດໄລຍະ 60 ປີຜ່ານມາ ໜັງສືພິມກອງທັບປະຊາຊົນລາວ ໄດ້ຮັບການພັດທະນາທັງດ້ານປະລິມານ ແລະ ຄຸນນະພາບ ເປັນຕົ້ນ: ດ້ານຄວາມໄວ ໄດ້ກ້າວຈາກລາຍເດືອນ ເປັນລາຍອາທິດ, ສອງຄັ້ງຕໍ່ອາທິດ ແລະ ກ້າວມາເປັນລາຍວັນ. ດ້ານເນື້ອໃນ ໄດ້ຮັບການພັດທະນາຈາກຄວາມຍາວ 4 ໜ້າເພີ່ມຂຶ້ນເປັນ 8 ໜ້າ ປະກອບມີຫຼາຍກວ່າ 40 ຄໍລໍາ, ດ້ານຮູບຮ່າງສີສັນ ກໍໄດ້ພັດທະນາຈາກຂາວດໍາ ມາເປັນສອດສີ, ດ້ານປະລິມານ ກໍໄດ້ເພີ່ມຂຶ້ນຕາມຄວາມຮຽກຮ້ອງຕ້ອງການຂອງຜູ້ອ່ານທັງພາຍໃນ ແລະ ນອກກອງທັບ, ພິເສດ ຍັງໄດ້ອອກໜັງສືພິມເອເລັກໂຕຣນິກ ຫຼື ເວັບໄຊ ເຊິ່ງມີທັງພາສາລາວ ແລະ ພາສາອັງກິດ ແລະ ມີເຟດບຸກ ທີ່ມີຊື່ວ່າ: Lao People’s Army News.
ຈາກນັ້ນ, ສະຫາຍ ພົນຈັດຕະວາ ວັນລະວົງ ນັນທະວົງ ຫົວໜ້າກົມນະໂຍບາຍ ກົມໃຫຍ່ການເມືອງກອງທັບ ໄດ້ຜ່ານຂໍ້ຕົກລົງ ຂອງກະຊວງປ້ອງກັນປະເທດ ວ່າດ້ວຍການຍ້ອງຍໍ ໃນນັ້ນ, ກະຊວງປ້ອງກັນປະເທດ ຕົກລົງ: ມອບຫຼຽນໄຊພິລະອາດຫານ ຊັ້ນ I ໃຫ້ກອງບັນນາທິການໜັງສືພິມກອງທັບປະຊາຊົນລາວ ແລະ ມອບຫຼຽນໄຊພິລະອາດຫານ ຊັ້ນ III ໃຫ້ພະແນກການ ທີ່ຂຶ້ນກັບກອງບັນນາທິການໜັງສືພິມກອງທັບປະຊາຊົນລາວ ຈຳນວນ 7 ພະແນກຄື: ພະແນກຂ່າວພາຍໃນກອງທັບ, ພະແນກຂ່າວເສດຖະກິດ, ວັດທະນະທຳ-ສັງຄົມ, ພະແນກຂ່າວຕ່າງປະເທດ, ພະແນກຕານ່າງຂ່າວ ແລະ ເພື່ອນຮ່ວມງານ, ພະແນກໜັງສືພີມເອເລັກໂຕຣນິກ, ພະແນກເຕັກນິກ-ຈັດໜ້າ ແລະ ພະແນກບໍລິຫານ-ການເງິນ.
ໃນໂອກາດນີ້, ສະຫາຍ ພົນໂທ ຄໍາລຽງ ອຸທະໄກສອນ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນງານທີ່ກອງບັນນາທິການໜັງສືພິມກອງທັບປະຊາຊົນລາວ ສ້າງໄດ້ຕະຫຼອດໄລຍະ 60 ປີຜ່ານມາ, ພ້ອມທັງໃຫ້ທິດຊີ້ນໍາຕໍ່ຄະນະພັກ-ຄະນະບັນນາທິການ, ພະນັກງານ-ນັກຮົບ ທົ່ວກອງບັນນາທິການໜັງສືພິມກອງທັບປະຊາຊົນລາວ ຫຼາຍບັນຫາສໍາຄັນ ເປັນຕົ້ນແມ່ນ ຄະນະພັກ-ຄະນະບັນຊາທຸກຂັ້ນ ຕ້ອງເອົາໃຈໃສ່ສຶກສາອົບຮົມການເມືອງ-ນໍາພາແນວຄິດ ໃຫ້ພະນັກງານ-ນັກຮົບເປັນປົກະຕິ ເຮັດໃຫ້ເຂົາເຈົ້າຮັບຮູ້ເຊື່ອມຊຶມ ແລະ ເຂົ້າໃຈແຈ້ງຕໍ່ແນວທາງນະໂຍບາຍຂອງພັກ, ກົດໝາຍຂອງລັດ, ມູນເຊື້ອການຕໍ່ສູ້ພິລະອາດຫານຂອງກອງທັບ ກໍຄືມູນເຊື້ອຂອງໜັງສືພິມກອງທັບປະຊາຊົນລາວ ໄປຄຽງຄູ່ກັບການສ້າງແບບແຜນວິທີເຮັດວຽກທີ່ມີວິທະຍາສາດ ເພື່ອສືບຕໍ່ປັບປຸງໜັງສືພິມກອງທັບປະຊາຊົນລາວ ໃຫ້ມີສີສັນຈົບງາມ, ມີເນື້ອໃນອຸດົມສົມບູນເລິກເຊິ່ງ ໂດຍນໍາສະເໜີບັນຫາທີ່ສັງຄົມໃຫ້ຄວາມສົນໃຈເພີ່ມຂຶ້ນ, ຮັບປະກັນຄວາມຖືກຕ້ອງຊັດເຈນ, ບໍ່ຜິດພາດທາງດ້ານການເມືອງ, ສະເໜີຂ່າວໃຫ້ວ່ອງໄວທັນເວລາ, ປັບປຸງວິທີການນໍາສະເໜີຂ່າວ, ຮູບແບບໂຄງສ້າງຂ່າວທີ່ກະທັດຮັດກົງກັບປະເດັນ, ຫຼາກຫຼາຍ, ປະດິດສ້າງ ແລະ ຊວນອ່ານ; ຈັດຕັ້ງແລກປ່ຽນບົດຮຽນລະຫວ່າງນັກຂ່າວຮຸ່ນອາວຸໂສກັບນັກຂ່າວຮຸ່ນໃໝ່, ສື່ຂອງກອງທັບກັບສື່ມວນຊົນອ້ອມຂ້າງສູນກາງໃນການຂຽນຂ່າວ, ຂຽນບົດ, ຖ່າຍຮູບ ແລະ ເຕັກນິກການຈັດໜ້າອອກແບບໃຫ້ເຂົ້າສູ່ຫຼັກການ ແລະ ມີຈຸດພິເສດເດັ່ນສະເພາະຂອງໜັງສືພິມກອງທັບປະຊາຊົນລາວ, ປັບປຸງເນື້ອໃນໜ້າເວັບໄຊຂອງໜັງສືພິມກອງທັບ ໃຫ້ທັນສະໄໝ ມີເນື້ອໃນດີ, ບັນຈຸຫຼາຍຄໍລຳ ແລະ ເພີ່ມບັນດາກົດໝາຍທີ່ກ່ຽວຂ້ອງກັບກອງທັບ ແລະ ກົດໝາຍອື່ນໆ ທີ່ສຳຄັນ ເຂົ້າໃນເວັບໄຊໜັງສືພິມກອງທັບປະຊາຊົນລາວ, ການອັບເດດໃຫ້ວ່ອງໄວທັນເວລາ ແລະ ຖືກຕ້ອງຊັດເຈນ, ພ້ອມດຽວກັນນີ້ຕ້ອງເອົາໃຈໃສ່ນໍາພາກົມກອງໃຫ້ມີຄວາມເຂັ້ມແຂງໜັກແໜ້ນ, ກົມກອງຄວາມສະຫງົບ, ສ້າງ ແລະ ຮັກສາໃຫ້ໄດ້ກົມກອງ-ໜ່ວຍພັກປອດໃສ ເຂັ້ມແຂງ ໜັກແໜ້ນ, ກົມກອງປອດໃສ ປອດໄພ ປອດຄະດີ, ຄຽງຄູ່ກັນນີ້ກໍ່ຕ້ອງເຊີດຊູຈິດໃນເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ນໍ້າໃຈປະຢັດມັດທະຍັດ, ຂຸດຂົ້ນທ່າແຮງບົ່ມຊ້ອນການຫາລາຍໄດ້ ຈາກການໂຄສະນາຜະລິດຕະພັນໃຫ້ບັນດາລັດວິຫາຫະກິດ, ບໍລິສັດຫ້າງຮ້ານ ແລະ ການຂາຍໜັງສືພິມສູ່ທາງນອກ ເພື່ອສ້າງແຫຼ່ງທຶນມາພັດທະນາກົມກອງ ເຮັດໃຫ້ຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງພະນັກງານ-ນັກຮົບນັບມື້ດີຂຶ້ນ, ເຊື່ອມຊຶມກໍາແໜ້ນແນວທາງການຕ່າງປະເທດຂອງພັກ, ເພີ່ມທະວີການພົວພັນຮ່ວມມືກັບໜັງສືພິມກອງທັບປະຊາຊົນຫວຽດນາມ, ໜັງສືພິມກອງທັບປົດປ່ອຍປະຊາຊົນລາວ ແລະ ໜັງສືພິມປະເທດສັງຄົມນິຍົມ ເພື່ອຖອດຖອນເອົາບົດຮຽນອັນດີມາພັດທະນາໜັງສືພິມກອງທັບປະຊາຊົນລາວ ທັງຍາດແຍ່ງເອົາການຊ່ວຍເຫຼືອດ້ານພາຫະນະສື່ມວນຊົນຕ່່າງໆ ໃຫ້ໄດ້ຫຼາຍ.
ແຫຼ່ງທີ່ມາຂອງຂໍ້ມູນ: ໜັງສືພິມກອງທັບ