ຄໍາສັ່ງແນະນໍາຂອງກະຊວງປ້ອງກັນປະເທດ ວ່າດ້ວຍການກະກຽມ ແລະ ຈັດຕັ້ງສະເຫຼີມສະຫຼອງ “ປີສາມັກຄີມິດຕະພາບ ລະຫວ່າງ ລາວ-ຫວຽດນາມໃນປີ 2017”

ເຖິງ: ຄະນະພັກ-ຄະນະບັນຊາ ບັນດາອົງການ, ກົມກອງທ້ອງຖິ່ນ, ວິທະຍາຄານ, ໂຮງຮຽນ, ໂຮງໝໍ ແລະ ຫົວໜ່ວຍທຸລະກິດທີ່ຂຶ້ນກັບກະຊວງປ້ອງກັນປະເທດ.

      ອີງຕາມຄໍາສັ່ງແນະນໍາຂອງຄະນະເລຂາທິການສູນກາງພັກກ່ຽວກັບການກະກຽມ ແລະ ຈັດຕັ້ງສະເຫຼີມສະຫຼອງປີສາມັກຄີມິດຕະພາບລະຫວ່າງ ລາວ-ຫວຽດນາມ ໃນປີ 2017.

      ອີງຕາມຂໍ້ຕົກລົງຂອງລັດຖະມົນຕີກະຊວງປ້ອງກັນປະເທດ ສະບັບເລກທີ 5093/ກປທ, ລົງວັນທີ 20/12/2016 ວ່າດ້ວຍການແຕ່ງຕັ້ງຄະນະຮັບຜິດຊອບ ແລະ ອະນຸກໍາມະການ, ແຜນການຂອງກະຊວງປ້ອງກັນປະເທດກ່ຽວກັບການກະກຽມ ແລະ ສະເຫຼີມສະຫຼອງປີສາມັກຄີມິດຕະພາບລະຫວ່າງ ລາວ-ຫວຽດນາມໃນປີ 2017.

      ກະຊວງປ້ອງກັນປະເທດມີຄໍາສັ່ງແນະນໍາດັ່ງນີ້:

      I. ຈຸດປະສົງ, ຄາດໝາຍ.

      1. ເປັນການຈາລຶກມູນເຊື້ອແຫ່ງການພົວພັນມິດຕະພາບ ແລະ ຄວາມສາມັກຄີພິເສດ ລາວ-ຫວຽດນາມ ເຊິ່ງເປັນປັດໄຈສໍາຄັນຕັດສິນໃຫ້ແກ່ໄຊຊະນະຂອງການປະຕິວັດລາວ ແລະ ຫວຽດນາມ ໃນພາລະກິດຕໍ່ສູ້ປົດປ່ອຍຊາດ ກໍຄືການສ້າງສາພັດທະນາປະເທດຊາດຂອງສອງປະເທດໃນປະຈຸ
ບັນ.

      2. ແນໃສ່ສຶກສາອົບຮົມພະນັກງານ, ສະມາຊິກພັກ ແລະ ນັກຮົບໃນທົ່ວກອງທັບປະຊາຊົນລາວ ໂດຍສະເພາະຄົນຮຸ່ນໜຸ່ມໃຫ້ມີຄວາມເຂົ້າໃຈເລິກເຊິ່ງ, ໜັກແໜ້ນ ແລະ ສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດນາມ ກໍຄືການປົກປັກຮັກສາໝາກຜົນຂອງການປະຕິວັດໄວ້ໃຫ້ຍາວນານ.

      3. ເພື່ອສະແດງຄວາມຮູ້ບຸນຄຸນຂອງພັກ, ລັດຖະບານ, ກໍາລັງປະກອບອາວຸດປະຕິວັດ ແລະ ປະຊາຊົນລາວບັນດາເຜົ່າຕໍ່ພັກ, ລັດ, ກອງທັບ ແລະ ປະຊາຊົນຫວຽດນາມອ້າຍນ້ອງທີ່ໄດ້ໃຫ້ການຊ່ວຍເຫຼືອອັນໃຫຍ່ຫຼວງ ແລະ ລໍ້າຄ່າໃນພາລະກິດຕໍ່ສູ້ປົດປ່ອຍຊາດ, ປົກປັກຮັກສາ ແລະ ພັດທະ
ນາປະເທດລາວ.

      4. ເພື່ອຢືນຢັນໃຫ້ຊາວໂລກເຫັນວ່າ: ເຖິງສະພາບການຂອງໂລກຈະມີການປ່ຽນແປງ ແລະ ຫັນປ່ຽນຢ່າງສະຫຼັບຊັບຊ້ອນ, ແຕ່ການພົວພັນຮ່ວມມືຮອບດ້ານ ແລະ ຄວາມສາມັກຄີພິເສດລະ
ຫວ່າງ ລາວ-ຫວຽດນາມ ຍັງຍືນຍົງຄົງໝັ້ນຕະຫຼອດໄປ.

      II. ເນື້ອໃນວຽກງານທີ່ຈະສຸມໃສ່ເຮັດ.

1. ຈັດຕັ້ງເປີດຂະບວນການເປີດແຂ່ງຂັນໃນໄລຍະສັ້ນ ເພື່ອສ້າງຜົນງານຕົວຈິງຂໍ່ານັບຮັບຕ້ອນວັນເຊັນສົນທິສັນຍາມິດຕະພາບຄົບຮອບ 40 ປີ ( 18/7/1997 – 18/7/2017 ) ແລະ ວັນສ້າງຕັ້ງສາຍພົວພັນການທູດລະຫວ່າງ ລາວ-ຫວຽດນາມຄົບຮອບ 55 ປີ ( 5/91962-5/9/2017) ແລະ ເປັນການຍູ້ຂະບວນການໃຫ້ຕໍ່ເນື່ອງຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວຄົບຮອບ 70 ປີ ໃຫ້ມີບັນຍາກາດຟົດຟື້ນແຂງແຮງ. ເນື້ອໃນຂໍ້ແຂ່ງຂັນໃຫ້ອີງໃສ່ 7 ຂໍ້ແຂ່ງຂັນຂອງຄໍາສັ່ງແນະນໍາ ຂອງລັດຖະມົນຕີກະຊວງປ້ອງກັນປະເທດ ສະບັບເລກທີ 6108/ກປທ, ລົງວັນທີ 22/12/2016 ເປັນເນື້ອໃນພື້ນຖານ.

2. ຈັດຕັ້ງໂຄສະນາປາຖະກະຖາມູນເຊື້ອສາຍພົວພັນມິດຕະພາບ, ຄວາມສາມັກຄີພິເສດ ແລະ ຮ່ວມສໍາພັນສູ້ຮົບລະຫວ່າງລາວ-ຫວຽດນາມໃນທົ່ວກອງທັບ ເພື່ອເຮັດໃຫ້ພະນັກງານນັກຮົບໄດ້ເຂົ້າໃຈຢ່າງເລິກເຊິ່ງ.

3. ຈັດຕັ້ງແຂ່ງຂັນປະດິດຄິດແຕ່ງບົດເພງ, ຂັບລໍາ, ດົນຕີ, ບົດຄວາມຊົງຈໍາ, ແຕ້ມຮູບມູນເຊື້ອຄວາມສາມັກຄີລະຫວ່າງ 2 ຊາດ 2 ກອງທັບລາວ-ຫວຽດນາມ ແລະ ເຄື່ອນໄຫວສະແດງສິລະປະວັນນະຄະດີ ຢູ່ກົມກອງໃຫ້ມີບັນຍາກາດເບີກບານມ່ວນຊື່ນ.

4. ຈັດຕັ້ງໂຄສະນາເຜີຍແແຜ່ ແລະ ໂຄສະນາປຸກລະດົມ.

ໂຄສະນາຜ່ານສື່ຕ່າງໆ: ຂຽນບົດນໍາ, ບົດຄວາມ, ຂ່າວ ແລະ ຈັດຕັ້ງສໍາພາດພະນັກງານ-ນັກຮົບ ພ້ອມກັນນັ້ນຈັດຕັ້ງເຄື່ອນໄຫວສາຍຮູບເງົາ-ວີດີໂອ.

ໂຄສະນາປະຈັກຕາ: ວາງສະແດງຮູບພາບການພົວພັນຮ່ວມມືລະຫວ່າງ 2 ກອງທັບລາວຫວຽດນາມ, ຄໍາຂວັນປະດັບປະດາດ້ວຍທຸງຊາດ-ທຸງພັກ ແລະ ທຸງສີຕ່າງໆຕາມສະຖານທີ່ສໍາຄັນ ແລະ ຄ້າຍຄູໃຫ້ມີສີສັນສວຍງາມ.

ໂຄສະນາທາງຊີວິດວັດທະນະທໍາ, ສ້າງລາຍການສະແດງ ແລະ ຈັດຕັ້ງເຄື່ອນໄຫວສິລະປະວັນນະຄະດີ ເພື່ອເຮັດໃຫ້ກົມກອງມີຄວາມເບີກບານມ່ວນຊື່ນ.

5. ຈັດຕັ້ງເຄື່ອນໄຫວກິດຈະກໍາສ້າງຄວາມຮັບຮູ້ທາງດ້ານວິຊາສະເພາະ, ວິຊາການ ແລະ ວິທະຍາ ສາດທີ່ຕິດພັນເຖິງການພົວພັນຮ່ວມມືລາວ-ຫວຽດນາມ ໂດຍເລັ່ງໃສ່ຊາຍໜຸ່ມ-ຍິງໜຸ່ມ ແລະ ນັກຮົບ-ພົນທະຫານໃນກົມກອງຂອງຕົນ ແລະ ປະສານສົມທົບກັບກົມກອງເພື່ອນ.

6. ຈັດຕັ້ງແຂ່ງຂັນກິລາປະເພດຕ່າງໆ ພາຍໃນກົມກອງ ແລະ ກົມກອງເພື່ອນ, ກົມກອງໃດມີການແຮກສ່ຽວ ແລະ ມີຊ່ຽວຊານຫວຽດນາມກໍຈັດໃຫ້ມີການແຂ່ງຂັນກິລາມິດຕະພາບເຊິ່ງກັນ ແລະ ກັນ ເພື່ອເປັນການຮັດແໜ້ນຄວາມສາມັກຄີ.

7. ການຈັດຕັ້ງສະເຫຼີມສະຫຼອງຂັ້ນກະຊວງ ກໍຈັດໃຫ້ມີພິທີໂຮມຊຸມນຸມໃນວັນທີ 18/7/2017 ໂດຍເຊີນເອກອັກຄະລັດຖະທູດ, ທີ່ປຶກສາທູດທະຫານ ແລະ ພາກສ່ວນຕ່າງໆເຂົ້າຮ່ວມ, ສ່ວນກົມກອງທ້ອງຖິ່ນທີ່ມີຊ່ຽວຊານ ແລະ ຮ່ວມມືແຮກສ່ຽວໃຫ້ຈັດພິທີສະເຫຼີມສະຫຼອງໃນວັນທີ 18/7/2017 ໂດຍເຊີນທາງກົງສູນ, ຊ່ຽວຊານ ແລະ ກົມກອງແຮກສ່ຽວເຂົ້າຮ່ວມ.

8. ກ່ຽວກັບງົບປະມານທີ່ຮັບໃຊ້ໃຫ້ແກ່ການກະກຽມ ແລະ ສະເຫຼີມສະຫຼອງປີສາມັກຄີມິດຕະພາບລະຫວ່າງ ລາວ-ຫວຽດນາມໃນປີ 2017 ແມ່ນຕ້ອງບົນພື້ນຖານປະຢັດມັດທະຍັດ ແລະ ຖືເອົາເນື້ອໃນການສຶກສາອົບຮົມ ແລະ ປຸກລະດົມຂະບວນການເປັນຕົ້ນຕໍ, ໃຫ້ນໍາໃຊ້ງົບປະມານປະຈໍາປີຂອງກົມກອງ.

9. ການຈັດຕັ້ງສະເຫຼີມສະຫຼອງປີສາມັກຄີມິດຕະພາບລະຫວ່າງ ລາວ-ຫວຽດນາມໃນປີ 2017 ແຕ່ລະກົມກອງຕ້ອງມີຄວາມຮັບປະກັນຄວາມສະຫງົບປອດໄພ 100%.

ເມື່ອໄດ້ຮັບຄໍາສັ່ງແນະນໍາສະບັບນີ້ແລ້ວ, ຄະນະພັກ-ຄະນະບັນຊາບັນດາອົງການ, ກົມກອງທ້ອງຖິ່ນຈົ່ງຈັດຕັ້ງປະຕິບັດໃຫ້ຖືກຕ້ອງ, ເຂັ້ມງວດ, ທັນເວລາ ແລະ ປະດິດສ້າງ ພາຍຫຼັງຈັດຕັ້ງສະເຫຼີມສະຫຼອງສໍາເລັດໃຫ້ສະຫຼຸບລາຍງານກົມໃຫຍ່ການເມືອງກອງທັບ ( ກົມໂຄສະນາອົບຮົມ ) ຮັບຊາບຕາມເວລາອັນຄວນ.

 

                                     ລັດຖະມົນຕີກະຊວງປ້ອງກັນປະເທດ

                                               ຈັນສະໝອນ ຈັນຍາລາດ